श्रीगुरुचरणसरोजं श्रीकरभवतरणसुकरदृढनावम् । मच्चितमधुपझङ्कृतमानन्दं नौमि शाङ्करं शरण्यम् ॥ १॥
ऐन्द्रधनुर्मरतकमामैरावतनाथगीर्भिरभ्यर्च्याम् । ऐङ्कारार्थस्वरूपामैशानीनाथसेवितां वन्दे ॥ २॥
ह्रीनतदैत्यसमूहां हृद्यां सुरलोकसेविताङ्घ्रियुगाम् । ह्रीङ्कारान्त्यसरूपां हृदयविलासप्रचोदितां वन्दे ॥ ३॥
क्लीङ्कारकामजननीं क्लीमितिशब्दप्रपूरितदिगन्ताम् । क्लीबस्त्रीपुंशब्दक्रीडारूपां नमामि विश्वमयीम् ॥ ४॥
चामरबिभ्रद्वाणीचन्द्रसजातासुसेव्यपार्श्वयुगाम् । चरणतलमहिषमुण्डां चापादिकरां नमामि चामुण्डाम् ॥ ५॥
मुण्डमणिहारकण्ठीं मुकुरकपोलप्रभासुशोभमुखीम् । मुहुरास्फालितधनुषं मुरहरभागिनीं नमामि मुग्धतनुम् ॥ ६॥
डाकिन्याद्यभितुष्टां डमरुकनादेन पूरितदिगन्ताम् । डम्भाभिमानहन्त्रीं डामरतन्त्रप्रकाशितां वन्दे ॥ ७॥
यैवर्णसत्यमायायस्यै दत्तान्यायुधानि शक्राद्यैः । यौवनमदसाम्राज्यायै तस्यै नमोऽस्तु विद्यायै ॥ ८॥
विश्वोत्तीर्णां विद्यां विविधजगच्चित्रकल्पनारूपाम् । वियदादिसृष्टिहेतुं विश्वासैकप्रकाशितां नौमि ॥ ९॥
चेतसि नितरां वासितचेतोमयि चैत्यचेतने चतुरे । चम्पककलिकानासे चामीकरभासुराङ्गि नौमि त्वाम् ॥ १०॥
अक्षरनवाक्षरीयं निक्षेपमयी सुवाक्सुधारूपा । एतत् स्तोत्रम् पठतां यच्छति सौभाग्यकीर्तिपुष्टिधृतीः ॥ ११॥
॥ इत्यानन्दनाथ पादपद्मोपजीविना काश्यपगोत्रोत्पन्नेनान्ध्रेण त्यागराजनाम्ना विरचितं नवाक्षरीस्तोत्रं सम्पूर्णम् ॥
